دۊای چەند ساڵ هەوڵ و کووشان ئەڕا پەڕەدان سیستم ئەوناسین دەنگ (تایپ ئۆتۆماتیک) ئەڕا زوان کوردی و دارەڕاکردن ئەو تەکنەلۆژییە ئەڕا دوو زاراوەی زوان کوردی واتە کوردیی ناوەندی و کوردیی ژووروو، ئامانجمان ئیەسە ک ئێرەنگه ئێ تەکنەلۆژییە ئەڕا کوردیی خوارین پەڕە ئەوپێ بەیمن. ئەڕا پەڕەدان ئێ سیستەمە هەوەجەمان وە هاوکاری ئیوە هاوڵاتییەیلە تا ک لە ئامادەکردن و کووکردن داتاگان یارمەتیمان بەین. ئەڕا ئێ مەبەستە ئیمە ئامرازێگ دروست کردیمنە ک ڕستەگان پێدان پێشنیار کەێ و ئیوە ڕستەگە تۆمار کەین. ئێمە ئێ دەنگەیلە لە کۆتایی ئەڕا دروستکردن سیستم ناسینەوەی دەنگ ئەڕا کوردی خوارین وە کار بەیمن. وەبێ بەشداریی چالاکانەی ئیوە پەڕەدان ئێ سیستمە مومکن نییە، هەر وەی ڕۊ، هاوکاریی ئیوە بووە بەش گرنگێ لەی هەوڵ نیشتمانییە. سەرەتا فرە سپاستان کەیمن ک لەی ڕێیە و لە پێشخستن زوانەگەمان ئەڕا ژیریی دەستکرد یارمەتیمان دەین.
ڕێنمایی تۆمارکردن دەنگ:
- ڕستەگان لە شوون بێدەنگ تۆمار بکەن.
- دەنگەگان یەکجی تۆمار مەکەن، پاش نیم کاتژمێر یا ئەوپەڕێ یەک کاتژمێر وچانێگ بێەن.
- ڕستەگان ڕێک لوای ئەوە گ نۊسریایە تۆمار بکەن، هیچ وشەیەگ نەپەڕنن.
- ڕستەگان وەپێ نۊسیاگە بخوننەی نەک زاراوەی خوەتان. ئەڕا وێنە ئەگەر نۊسیاس (چم) وە (ئەچم) مەخوننەی. یا هەر لێوا ئەگەر (ئەچم) نۊسیاس وە (چم) نەخوەننەی.
- وەر لە تۆمارکردن ڕستەگە جارێگ وە دەنگ بەرز بخوننەی تا ک دڵنیا بوون گ ئامادەن ئەڕا تۆمارکردنێ.
- وەر لەوە ک تۆمارکردن لێ بێەن، دەست مەکەن وە خوەنینێ، با وشەگان سەرەتا نەقرتیەن.
- پاش ئەوە ڕستەگە تەمام بۊ لە یەک چرک مایکەگە ڕابگرن، بیلن بێدەنگیی فرەیگ لە کۆتایی فایلەگەوا نەو. هەرلوا وەر لە تەمام بۊن خوەنینەگە، ڕاگرتن لێ مێەن، با وشەگان کۆتایی نەقرتیەن.
- وەر لەوە دەنگەگە کل بکەن، گووش لێ بگرن تا ک دڵنیا بوون ک دۊزمەیگ لە فایلەگەوا نییە و دەنگەگە ڕووشنە. ئەگەر دەنگەگە ڕووشن نەبۊ، قرچەقرچ لە دەنگەگەوا هەبۊ، وشەیگ پەڕانۊن، قووتەتان بۊ، زوان ئەڵەنگووتنتان بۊ یا هەر گیچەڵ ترەک لەوای ئێ بابەتە، جارێگ تر تۆماری بکەن و دۊاجار کلێ بکەن.
- با مایکەگە فرە لە دەمدان دۊر نەو کاتێ دەنگ تۆمار کەین.
- مایکەگەدان فرە مەجووڵنن.
- وە لەپتۆب و مۆبایلیش تۊەنن دەنگ تۆمار بکەن، ئەمان مۆبایل خاسترە.
- لە شوونێگ دەنگ تۆمار مەکەن ک کەسانێ لە دەوروەرتان قسە کەن.
- ڕستەگان نە فرە نزم بخوننەی نە فرە خێرا، با خێرایی خونینەگەتان نۆرماڵ بوو.